እንዴት ነው ለአላህ ፍጹም (ሙኽሊስ) የምትሆነው?
    face
  •   
  •  
ሕያው፣ሁሉን ነገር አስተናባሪው አላህ . .

Icreasefontsize decreasefontsize

እንዴት ነው ለአላህ ፍጹም (ሙኽሊስ) የምትሆነው?

ቅርጽና ይዘቱ፣ውጭና ውስጡ የማይጣጣም ሥራ ሁሉ ውድቅ ነው።

አንደኛ - የአላህን ﷻ ተውሒድ እውን በማድረግ። አላህ ﷻ እንዲህ ብሏል፦ ‹‹ሃይማኖትን ለርሱ ብቻ ያጠራህ ኾነህ ተገዛው። ንቁ! ፍጹም ጥሩ የኾነው ሃይማኖት የአላህ ብቻ ነው።›› [አልዙመር፡2-3]

በተጨማሪም አላህ ﷻ እንዲህ ብሏል፦ ‹‹አላህን ሃይማኖትን ለርሱ ብቻ አጥሪዎች፣ ቀጥተኞች ኾነው ሊግገዙት፣. . እንጅ ያልታዘዙ ሲኾኑ (ተለያዩ)።›› [አልበይይናህ፡5]

ሁለተኛ - ለአላህ መልክተኛ ﷺ ተከታይ መሆንን በማረጋገጥ፣ያዘዙትን በመፈጸም፣ከከለከሉት ሁሉ በመራቅና የተናገሩት ሁሉ እውነት መሆኑን በመቀበል። አላህ ﷻ እንዲህ ብሏል፦ ‹‹እላንተ ያመናችሁ ሆይ! አላህን ተገዙ፤መልክተኛውንና ከናንተም የሥልጣን ባለቤቶችን ታዘዙ፤በማንኛውም ነገር ብትከራከሩ፣በአላህና በመጨረሻው ቀን የምታምኑ ብትኾኑ (የተከራከራችሁበትን ነገር) ወደ አላህና ወደ መልክተኛው መልሱት፤ይህ የተሻለ፣መጨረሻውም ያማረ ነው።›› [አልኒሳእ፡59]

ሦስተኛ - ሙኽሊስ መሆን ከፈለግህ በመልካም ሥራህ ላይ ትጋት ይኑርህ፤ከርሱ ጥላ በስተቀር ሌላ ጥላ በሌለበት የቅያማ ቀን አላህ ﷻ በጥላው ስር ከሚያስጠልላቸው ሰባቱ ውስጥ አንዱ፦ ‹‹ . . መጽዋትን መስጠቱን የደበቀ (ደብቆ የሰጠ) ሰው . . ›› መሆኑን ሁሌ አስታውስ። (በቡኻሪ የተዘገበ)

በተጨማሪም ፦ ‹‹ሥራዎች (የሚለኩት) በንይ"ያ (ከጀርባቸው ባለው ቁርጠኛ) . . ›› መሆኑን አስታውስ። (በቡኻሪ የተዘገበ)

ከአላህ ﷻ በስተቀር ለሥራህ መስካሪና ሸላሚ ባለመፈለግ ለርሱ ብቻ ፍጹም ሁን።

አራተኛ - ልብህ የሰውን ምስጋና እና ውዳሴ ወደ መውደድ አያምራ። በሰዎች እጅ ካለው ነገር ሁሉ ተስፋ ቆርጠህ በፈጣሪህ ላይ ብቻ ተስፋህን ጣል። ለጌታው ፍጹም የሆነ ሙኽሊስ ሰው ለሚያገኘው ሀብት ወይም ለሚያገባት ሴት አይጓጓም፤የሚከጅለውና የሚጓጓው ለአላህ ﷻ እዝነትና ችሮታ ነው።

አምስተኛ - ፍጹምነትንና ቅን ልቦናን ይሰጥህ ዘንድ፣ከልታይባይነት አጥርቶህ ያለፉ ኃጢቶችህን ይምርህ ዘንድ ከጌታህ ፊት ወድቀህ ከደጁ በመንከባለል እርሱን መለመንና መማጸን ይኖርብሃል።

ስድስተኛ - ከታይታና ከመመጻደቅ መራቅና መጠንቀቅ። አንድ የአላህ አገልጋይ ታይታ (ሪያእ) ወደ ልቡ የሚመጣበትን መንገድና መግቢያ በሩን ካላወቀ፣ከእኽላስ መንገድ ይርቃል። በዚህ ምክንያት ነው አንዳንድ ሰዎች የአላህ ጻድቅ (ወሊይ) አድርገው ራሳቸውን ሲገልጹ የሚስተዋሉት፣ወይም ሌሎች እንደዚያ ተብለው መጠራትን የሚወዱት፣ወይም ስለ ዕባዳቸውና ስለ በጎ ሥራዎቻቸው ማውራትና መመጻደቅን የሚያዘወትሩት።

አላህ ﷻ እንዲህ ብሏል፦ ‹‹ቅርቢቱን ሕይወትና ጌጣጌጧን የሚሹ የኾኑትን ሰዎች፣ሥራዎቻቸውን (ምንዳዋን) በርሷ ውስጥ ወደነሱ እንሞላላቸዋለን፤እነርሱም በርሷ ውስጥ ምንም አይጎድልባቸውም። እነዚያ እነርሱ በመጨረሻይቱ ዓለም ለነርሱ ከእሳት በቀር የሌለላቸው ናቸው፤የሠሩትም ሥራ በርሷ ውስጥ ተበላሸ፤(በቅርቢቱ ዓለም) ይሠሩት የነበሩትም በጎ ሥራ ብልሹ ነው።›› [ሁድ፡15-16]

እኽላስና ምስጋና እና ውዳሴን መውደድ በአንድ ልብ ውስጥ አብረው አይኖሩም፤ውሃ እሳትን እንደሚያጠፋ አንዱ ሌላውን ያወድማል ያጠፋዋል።

ታይታ ትንሹ ሽርክ (በአላህ ማጋራት) ነው። ከአስከፊ ፍጻሜው መካከል ሥራዎች ላይ ላዩን በጎ ቢመስሉ እንኳ በእኽላስ ካልተሠሩ ተቀባይነት የማይኖራቸውና ወደ ባለቤቶቻቸው የሚመለሱ ወዳቂ መሆናቸው ብቻ በቂ ነው።

ሰባተኛ - እኽላስ ካላቸው ሰዎች ጋር መጎዳኘት። ነቢዩ ﷺ እንዲህ ብለዋል፦ ‹‹ሰው በወዳጁ ሃይማኖት ላይ ነው (አርአያነቱን ይከተላል) . . ›› (በትርምዚ የተዘገበ)

ስምንተኛ - ዕባዳን በድብቅና በስውር ማድረግ። አላህ ﷻ እንዲህ ብሏል፦ ‹‹ምጽዋቶችን ብትገልጹ፣እርሷ ምንኛ መልካም ናት፤ብትደብቋትና ለድኾች ብትሰጧትም፣እርሱ ለናንተ በላጭ ነው።›› [አልበቀራህ፡271]

ዘጠነኛ - የገዛ ራስን በማያቋርጥ ሁኔታ ሁሌ በጥብቅና በጥልቀት መመርመር። አላህ ﷻ እንዲህ ብሏል፦ ‹‹እነዚያም በኛ መንገድ የታገሉ፣መንገዳችንን በእርግጥ እንመራቸዋለን፤›› [አልዐንከቡት፡69]

የሚከተለውን የአላህ ﷻ ቃል አስተውል፦ !!‹‹በኛ መንገድ››!!

ዐስረኛ - አዘውትሮ ወደ አላህ መጸለይና ፊትን ወርሱ መመለስ። ደሃውና ጎስቋላው ሰው የቸር ጌታውን ደጃፍ ካዘወተረ ይራራለታል፣ያዘንለታል፤የለመነውን ይሰጠዋል፤ችግሩን ይፈታለታል፤የጎደለውንም ያሟላለታል። . . የሚለመነውና የሚጠየቀው አላህ ﷻ ብቻ ነውና።

   
Subscibe