አላህንﷻ ለሰው ልጆች በሚያስተዋውቁ መልክተኞች (ሩሱል) ማመን
    face
  •   
  •  
አሸናፊው አላህ . .

Icreasefontsize decreasefontsize
الإيمان برسل الله | حقوق نبينا محمد صلى الله عليه وسلم

አላህንﷻ ለሰው ልጆች በሚያስተዋውቁ መልክተኞች (ሩሱል) ማመን

አላህ ﷻ ባሮቹን እንዲሁ ለከንቱ አልፈጠራቸውም። ለዚህም ነው እርሱነቱን፣ኃያልነቱን፣ምሉእነቱንና ሕግጋቱን የሚያስተዋውቁ መልክተኞችን ወደ ሰው ልጆች የላካቸው። ከሰው ልጆች መካከል ብልጫና ትሩፋት ያላቸውን መርጦ መልክቱን እንዲያደርሱ መልክተኞቹ አድርጎ ልኳቸዋል። ከመልክተኞቹ መካከል ኑሕ፣ኢብራሂም፣ሙሳና ዒሳ ሲገኙ አለህ መልእክቱን ያጠቃለለው በመልክተኞቹ ቁንጮና በላጫቸው በሆኑት በመልክተኛው በሙሐመድ ﷺ ነው። እውነተኞች መሆናቸውን የሚያመለክቱ ታምራትና ምልክቶችን ለሁሉም የሰጣቸው ሲሆን፣ሁሉም ሰዎችን ከፈጣሪ ጌታቸው ጋር አስተዋውቀዋል፤የተሰጣቸውን ተልእኮም በታማኝነት ተወጥተዋል። በመሆኑም ከአላህ ተልከው ባደረሱት መልክትና በእውነታኛነታቸው ያላመነ ሰው በአላህ አላመነም። አላህ ﷻ እንዲህ ብሏል፦ ‹‹መልክተኛው፣ከጌታው ወደርሱ በተወረደው አመነ፤ምእመኖችም (እንደዚሁ)፤ሁሉም በአላህ፣በመላእክቱም፣በመጻሕፍቱም፣በመልክተኞቹም፣ . . . አመኑ፤›› [አልበቀራህ፡258]

ከአላህ ﷻ የተላኩ በመሆናቸውም አንዳቸውን ከሌላው ሳንለይ በሁሉም እናምናለን። አላህ ﷻ እንዲህ ብሏል፦ ‹‹ከመልክተኞቹ በአንድም መካከል አንለይም፣(የሚሉ ሲኾኑ)፣›› [አልበቀራህ፡258]

አላህ ﷻ የሰው ልጆች የሚመሩባቸው ብርሃን ይሆኑ ዘንድ፣ከመልክተኞቹ ጋር መለኮታዊ መጽሐፎችን አውርዷል። በዚህም መሰረት ለኢብራሂም ሱሑፍን (ጽሑፎቹን)፣ለዳውድ ዘቡርን፣ለሙሳ ተውራትን፣ለዒሳ ኢንጂልን፣ለሙሐመድ ﷺ ደግሞ ታምራዊውን ታላቁን ቁርኣን ሰጥቷል። የአላህ ﷻ እንዲህ ብሏል፦ ‹‹(ይህ ቁርኣን) አንቀጾቹ በጥንካሬ የተሰከኩ፣ከዚያም የተዘረዘሩ የኾነ መጽሐፍ ነው፤ጥበበኛ ውስጠ ዐዋቂ ከኾነው ዘንድ (የተወረደ) ነው።›› [ሁድ፡1]

አላህﷻ ቁርኣንን መመሪያ፣ብርሃን፣ብሩክና አስረጅ አድርጎታል። አላህ ﷻ እንዲህ ብሏል፦ ‹‹ይህም ያወረድነው የኾነ የተባረከ መጽሐፍ ነው፤ተከተሉትም፤ይታዘንላችሁም ዘንድ (ከክሕደት) ተጠንቀቁ።›› [አልአንዓም፡155]

በተጨማሪም አላህﷻ እንዲህ ብሏል፦ ‹‹እላንተ ሰዎች ሆይ! ከጌታችሁ ዘንድ በእርግጥ አስረጅ መጣላችሁ፤ወደናንተም ገላጭ የኾነን ብርሃን (ቁርኣንን) አወረድን።›› [አልኒሳእ፡174]

አላህ ﷻ ከሰው ልጆች ሁሉ ተመራጭና የነቢዮችና የመልክተኞች መደመደሚያ በሆኑት ታላቁ ሙሐመድ ﷺ ማመንን፣ይዘው የመጡትን ትምሕርት አምኖ መቀበልን በአላህ አንድነት ከማመን ጋር የተቆራኘ አድርጎታል። የእስላም የመጀመሪያው ማእዘን የሆነው ‹‹አሽሀዱ አን ላ እላሀ እልለሏህ ወአሽሀዱ አንነ ሙሐመደን ረሱሉሏህ›› (ከአላህ በቀር ሌላ አምላክ አለመኖሩን እመሰክራለሁ፤ሙሐመድም የአላህ መልክተኛ መሆናቸውን እመሰክራለሁ) የሚለው ቃለ ተውሒድ (ሸሃዳ)፣በአላህ ማመንን ሙሐመድ አላህ መልክተኛ መሆናቸውን ከማመን ጋር አንድ ላይ ያጣመረ ቃለ ምስክርነት ነው። አላህ ﷻ ነቢዩን ለዓለማት ሁሉ እዝነትና ርህራሄ አድርጎ ልኳቸዋል። ነቢዩም ﷺ ሰዎችን ከጨለማ ወደ ብርሃን፣ከማይምነት ወደ ዕውቀት፣ከጥመት ወደ ቅን መንገድና ወደ ኢማን አውጥተዋል። የተጣለባቸውን አደራም በሚገባ ተወጥተዋል፤ሕዝባቸውንም በፍጹምነት መክረዋል። ለሕዝባቸው እምነትም በጣም የሚጓጉ አሳቢ ነበሩ።

ይህን በማስመልከት አላህ ﷻ እንዲህ ብሏል፦ ‹‹ከጎሳችሁ የኾነ፣ችግራችሁ በርሱ ላይ ጥኑ የኾነ፣በናንተ (እምነት) ላይ የሚጓጓ፣ለምእመናን ርኅሩህ አዛኝ የኾነ መልክተኛ፣በእርግጥ መጣላች።›› [አልተውባህ፡128]

አላህ ﷻ ለነቢዩና ለመልክተኛው ምእመናን ሊወጠዋቸው የሚገቡ ተገቢ ክብርና መብት ሰጥቷቸዋል፤የሰው ልጆች ምርጥና ተቀዳሚ መሪም አድርጓቸዋል። ይህን አስመልክተው ነቢዩﷺ እንዲህ ብለዋል፦ ‹‹እኔ ከኣደም ልጆች ሁሉ ተመራጩ መሪ ነኝ፤(በአላህ ባሪያነቴ እንጂ) በዚህ ግን አልፎክርም።›› (በእብን ማጀህ የተዘገበ)

ለነቢዩ ﷺ ካሉብን ኃላፊነቶች መካከል፦

1-የአላህ ባሪያና መልክተኛው መሆናቸውን፣አላህ ﷻ ለዓለማት እዝነት አድርጎ የላካቸው፣አደራውን በታማኝነት ያደረሱና ተልእኮውን በተሟላ መልኩ የፈጸሙ መሆናቸውን ማመን ዋነኞቹ ናቸው። አላህ ﷻ እንዲህ ብሏል፦ ‹‹በአላህና በመልክተኛውም፣በዚያም ባወረድነው ብርሃን እመኑ።›› [አልተጋቡን፡8]

ነቢዩ ﷺ እንዲህ ብለዋል፦ ‹‹የሙሐመድ ነፍስ በእጁ በሆነው (አላህ) እምላለሁ፤ከዚህ ሕዝብ (ኡመት) ውስጥ አይሁዳዊም ይሁን ክርስቲያን፣መልእክቴን ከሰማ በኋላ በተላክሁበት ነገር ሳያምን የሞተ ማንኛውም ሰው፣ከእሳት ጓዶች አንዱ ከመሆን ውጭ ሌላ ዕድል የለውም።›› (በሙስሊም የተዘገበ)

2-ነቢዩﷺ ከጌታቸው ዘንድ ይዘው የመጡትን ሁሉ አምኖ መቀበል፣ከአላህ ያመጡት ሁሉ ያለ ምንም ጥርጣሬ ፍጹም እውነት መሆኑን በእርግጠኝነት ማመን። አላህ ﷻ እንዲህ ብሏል፦ ‹‹(እውነተኞቹ) ምእምናን እነዚያ በአላህና በመልክተኛው ያመኑት፣ከዚያም ያልተጠራጠሩት፣ . . . ብቻ ናቸው፤›› [አልሑጁራት፡15]

በተጨማሪም ﷻ እንዲህ ብሏል፦ ‹‹በጌታህም እምላለሁ (አላህ በራሱ መማሉ ነው)፤በመካከላቸው በተከራከሩበት ፍርድ እስከሚያስፈርዱህ፣ከዚያም ከፈረድከው ነገር በነፍሶቻቸው ውስጥ ጭንቀትን እስከማያገኙና ፍጹም መታዘዝንም እስከሚታዘዙ ድረስ አያምኑም፣(ምእምን አይሆኑም)።›› [አልኒሳእ፡65]

3-ነቢዩን ﷺ መውደድ። አላህ ﷻ እንዲህ ብሏል፦ ‹‹፦ አባቶቻችሁና ወንዶች ልጆቻችሁ፣ወንድሞቻችሁም፣የሰበሰባችኋቸው ሀብቶችም፣መክሰሩዋን የምትፈሩዋት ንግድም፣የምትወዷቸው መኖሪያዎችም፣እናንተ ዘንድ ከአላህና ከመልክተኛው፣በርሱ መንገድም ከመታገል፣ይበልጥ የተወደዱ እንደኾኑ፣አላህ ትእዛዙን እስኪያመጣ ድረስ ተጠባበቁ፣በላቸው፤አላህም አመጠኞች ሕዝቦችን አይመራም።›› [አልተውባህ፡24]

ነቢዩ ﷺ እንዲህ ብለዋል፦ ‹‹አንዳችሁ፣ከአባቱ ከልጁና ከሰዎች ሁሉ ይበልጥ እርሱ ዘንድ የተወደድኩ እስካልሆንኩ ድረስ፣(እውነተኛ) አማኝ አይሆንም።›› (በቡኻሪ የተዘገበ)

4-ነቢዩን ﷺ ማክበርና ደረጃቸውን ማላቅ። አላህ ﷻ እንዲህ ብሏል፦ ‹‹በአላህ ልታምኑ፣በመልክተኛውም፣(ልታምኑ) ልትረዱትም ልታከብሩትም፣›› [አልፈትሕ፡9]

በተጨማሪም አላህ ﷻ እንዲህ ብሏል፦ ‹‹እነዚያም በርሱ ያመኑ፣ያከበሩትም፣የረዱትም፣ያንን ከርሱ ጋር የተወረደውን ብርሃን የተከተሉ፣እነዚያ እነሱ የሚድኑ ናቸው።›› [አልአዕራፍ፡157]

5-ነቢዩንﷺ ማፍቀርና መውደድ፣ሙስሊም ሆነው በርሳቸው መንገድ የተጓዙና ፈለጋቸውን የተከተሉ ቤተሰቦቻቸውን ማክበር፣ነቢያችን ሙሐመድ ﷺ ስለ ቤተሰቦቻቸው የሰጡትን ማሳሰቢያ መቀበል። ነቢዩﷺ እንዲህ ብለዋል፦ ‹‹በቤተሰቦቼ ጉዳይ አላህን እንድታስቡ አስታውሳችኋለሁ፤በቤተሰቦቼ ጉዳይ አላህን እንድታስቡ አስታውሳችኋለሁ፤በቤተሰቦቼ ጉዳይ አላህን እንድታስቡ አስታውሳችኋለሁ።›› (በሙስሊም የተዘገበ)

የነቢዩﷺ ቤተሰብ የሚባሉት ባለቤቶቻቸውን፣ልጆቻቸውንና ዘካ መቀበል ሐራም የተደረገባቸውን የቅርብ ዘመዶቻቸውን የሚያካትት የክቡራን ሰዎች ስብስብ ነው። አህሉል በይትን ክብራቸውን መንካትና መዝለፍ የማይፈቀድ ሲሆን፣ከኃጢአት የተጠበቁና ከአላህ ሌላ የሚመለኩ አድርጎ መውሰድም የተከለከለ ነው።

6-አምነው የተከተሏቸውን ባልደረቦቻቸውን (ሶሓባ) በክፉ አለማንሳት፣ታሪካቸውን አለማጉደፍና የነቢዩ ሶሓባ አላህ ﷻ ያሞገሳቸው ትውልድ መሆናቸውን ማወቅ። ይህን በማስመልከት አላህ ﷻ እንዲህ ብሏል፦ ‹‹የአላህ መልክተኛ ሙሐመድ፣እነዚያም ከርሱ ጋር ያሉት (ወዳጆቹ) በከሐዲዎቹ ላይ ብርቱዎች፣በመካከላቸው አዛኞች ናቸው፤አጎንባሾች ሰጋጆች ኾነው ታያቸዋል፤ከአላህ ችሮታንና ውዴታን ይፈልጋሉ፤ምልክታቸው ከስግደታቸው ፈለግ ስትኾን በፊቶቻቸው ላይ ናት፤›› [አልፈትሕ፡29]

ስለ ሶሓባ ሲናገሩ ነቢዩﷺ እንዲህ ብለዋል፦ ‹‹ባልደረቦቼን አትዝለፉ! ባልደረቦቼን አትዝለፉ! ነፍሴ በእጁ በሆነው እምላለሁ፣አንዳችሁ የኡሑድን ተራራ የሚያክል ወርቅ ቢለግስ እንኳ (ምንዳው) የነሱን አንድ እፍስም (ሙድ) ሆነ ግማሹንም እንኳ አይደርስም።›› (በሙስሊም የተዘገበ)

ከሶሓባ በደረጃ ባላጮቹ አራቱ ቅን ኸሊፋዎች ማለትም አቡ በክር፣ዑመር፣ዑሥማንና ዐሊይ (ረ.ዐ) ናቸው። አላህ ﷻ እንዲህ ብሏል፦‹‹ከስደተኞቹና ከረዳቶቹም ሲኾኑ፣የመጀመሪዎቹ ቀዳሚዎች፣እነዚያም በበጎ ሥራ የተከተሏቸው፣አላህ ከነሱ ወዷል (ሥራቸውን ተቀብሏል)፤ከርሱም ወደዋል (በተሰጣቸው ምንዳ ተደስተዋል)፤በሥሮቻቸውም ወንዞች የሚፈሱባቸን፣ገነቶች በውስጣቸው ዘለዓለም ነዋሪዎች ሲኾኑ ለነርሱ አዘጋጅቶላቸዋል፣ይህ ታላቅ ዕድል ነው።›› [አልተውባህ፡100]

የነቢዩ ﷺ ባልደረቦች ከነቢዩ የተቀበሉትን ለኛ ያደረሱና የጠራ ሃይማኖትና ዕውቀት ያስተላለፉልን የወርቃማው ትውልድ አባላት ናቸው።

   
Subscibe