face
  •   
  •  
አሸናፊው አላህ . .
Icreasefontsize decreasefontsize
 مفهوم الخوف من الله | دواعي الخوف من الله |متعلقات الخوف من الله |ثمرات الخوف من الله  | خوف العارفين بالله |أحكام الخوف وتنبيهاته

አላህን ﷻ መፍራት (አልኸውፍ)

የፍርሃት (ኸውፍ) ጽንሰ ሀሳብ ፦

አላህን መፍራት ከታላላቅ የልቦና ዕባዳዎች አንዱ ነው። አላህ ﷻ እንዲህ ብሏል ፦ ‹‹ይሃችሁ፣ሰይጣን ብቻ ነው፣ወዳጆቹን ያስፈራራችኋል፤አትፍሩዋቸውም፤ምእምናንም እንደኾናችሁ ፍሩኝ።›› [ኣል ዒምራን፡175]

‹‹አላህ ነፍሱን ያስጠነቅቃችኋል።›› [ኣል ዒምራን፡30]

ከዚህ አንቀጽ አንድ አላህን ብቻ መፍራት ግዴታ መሆኑን፣ለኢማን መሟላት ካለባቸው ነገሮችም አንዱ መሆኑ በአጽንኦት ተገልጿል። አንድ ሰው አላህን የሚፈራው በኢማኑ ጥንካሬ መጠን ነው።

እመ ምእመናን ዓእሻ (ረ.ዐ) እንዲህ ብለዋል ፦ ነቢዩንﷺ ስለዚህ አንቀጽ ጠየቅኋቸው ፦‹‹እነዚያም የሚሰጡትን ነገር እነርሱ ወደ ጌታቸው ተመላሾች መኾናቸውን፣ልቦቻቸው የሚፈሩ ኾነው የሚሰጡት።›› እነዚህ አስካሪ መጠጥ የሚጠጡና የሚሰርቁ ናቸውን?! ‹‹የአስሲድዲቅ ልጅ ሆይ! አይደሉም፤ግና እነዚያ ተቀባይነት እንዳያጡ እየፈሩና እየሰጉ የሚጾሙ፣የሚሰግዱና ምጽዋት የሚሰጡ ናቸው›› አሉ። (በትርምዚ የተዘገበ)

አላህን ﷻ ለመፍራት የሚገፋፉ ነገሮች ፦

1-ስሞቹንና ባሕርያቱን አስመልክቶ በሚኖር ዕውቀት ምክንያት፣ለኃያልነቱና ለግርማ ሞገሱ ተገቢ በሆነ ሁኔታ አላህን ﷻ ማክበርና ማላቅ። ‹‹‹ጌታቸውን ከበላያቸው ሲኾን ይፈሩታል፤›› [አልነሕል፡50]

2-የፍጻሜው መጨረሻ ወደሚጠላውና ወደ አስከፊው አሳማሚ የገነም እሳት እንዳይሆን መፍራት ።

3-ሙእምን ሰው አላህ ﷻ ነገሩን ሁሉ የሚያይና በዝርዝር የሚያውቀው መሆኑን፣በርሱ ላይም ፍጹማዊ ሥልጣን ያለው መሆኑን መገንዘብ፣ያሉበትን ግዴታዎች በመወጣት ረገድ ተገቢውን ያደረጉ የመሆንን ስሜት ሁሌም ማሳደር። ጥፋት ከፈጸመበት ኃያል ፈጣሪ ታላቅነት አንጻር የተፈጸመውን ጥፋትም አቅልሎ አለመመልከት።

4-በርሱ ላይ ባመጸና ከሸሪዓው ባፈነገጠ፣ወደርሱ የተላከውን ብርሃን ችላ ባለ ሰው ላይ በተላለፈ ማስጠንቀቂያና ማስፈራሪያ የተሞላውን የአላህን ﷻ ንግግር አስተውሎ ማስተንተን።

5-ቁርኣንና የነቢዩን ሐዲሥ አስተውሎ መረዳትና የነቢዩንﷺ የሕይወት ታሪክ (ሲራ) ማጥናት።

አላህን መፍራት እርሱን ማወቅ ያስከትላል። እርሱን ማወቅ ደግሞ እርሱን መስጋት ያስከትላል። ቅጣቱንና ማስጠንቀቂያውን መስጋት ደግሞ ለርሱ ተገዥና ታዛዥ መሆንን ያስገኛል።

6-የ አላህን ﷻ ኃያልነት ማሰብ ማሰላሰልና ማስተንተን። ይህን አስተንትኖ ያስተዋለ ሰው፣የላቁ ባሕርያቱን (ስፋቱን)፣ግርማ ሞገሱንና ኃያልነቱን ይረዳል። ልቡ የአላህን ﷻ ኃያልነትና ግርማ ሞገሱን የመሰከረ ሰውም፣የርሱ ማስጠንቀቂያና ማስፈራሪያ ምን ማለት እንደሆነ የግድ ይገነዘባል። አላህ ﷻ እንዲህ ብሏል ፦ ‹‹አላህ ነፍሱን ያስጠነቅቃችኋል።›› [ኣል ዒምራን፡28]

አላህ ﷻ እንዲህ ብሏል ፦ ‹‹አላህንም በትንሣኤ ቀን ምድር በመላ (አንድ) ጭብጡ ስትኾን፤ሰማያትም በኃይሉ የሚጠቀለሉ ሲኾኑ፣(ከርሱ ጋር ሌላን በማጋራታቸው) ተገቢ ክብሩን አላከበሩትም።›› [አልዙመር፡67]

7-ሞትና ጭንቁን፣ደራሽና አይቀሬ መሆኑን ማሰብና ማስተንተን ፦ ‹‹ያ ከርሱ የምትሸሹት ሞት እርሱ በእርግጥ አግኛችሁ ነው፤›› [አልጁሙዓህ፡8]

ሞት ለአላህ ያለንን ፍራቻ ይጨምራል። ነቢዩﷺ ከእንዲህ ብለዋል፦ ‹‹የደስታና የእርካታዎችን ቆራጭ (ሞትን) ማስታወስ አብዙ፤በጭንቅ ኑሮ ላይ ሆኖ ያስታወሰው ማንኛውም ሰው (ኑሮው) ይሰፋለታል፤በድሎት ላይ ሆኖ ያስታወሰው ማንኛውም ሰው ደግሞ (ምንም ቢደላው ድሎቱን) ይጠብበታል።›› (በጠበራኒ የተዘገበ)

8-ከሞት በኋላ ያሉትን ነገሮች፣መቃብርንና በውስጡ ያሉ አስበርጋጊ ሁኔታዎችን ማሰብና ማስተንተን። ነቢዩ ﷺ እንዲህ ብለዋል፦ ‹‹መቃብሮችን ከመጎብኘት ከልክያችሁ ነበር፣ኣኽራን (የወዲያኛውን ዓለም) ስለሚያስታውሷችሁ ጎብኟቸው፡›› (በእብን ማጃህ የተዘገበ)

በራእ t የሞከተለውን አስተላልፈዋል፦ ‹‹በአንድ የቀብር ስነ ሥርዓት ላይ ከአላህ መልክተኛﷺ ጋር ነበርን፤በመቃብሩ አፋፍ ላይ ተቀመጡና አፈሩ እስኪረጥብ ድረስ አለቀሱ፤ከዚያም፦ ወንድሞቼ ሆይ! ለእንዲህ ዓይነቱ ሁኔታ ራሳችሁን አዘጋጁ፣አሉን።›› (በእብን ማጃህ የተዘገበ)

አላህ ﷻ እንዲህ ብሏል ፦ ‹‹እላንተ ሰዎች ሆይ! ጌታችሁን ፍሩ፤ወላጅም ከልጁ (በምንም) የማይጠቅምበትን፣ተወላጅም እርሱ ወላጅን በምንም ጠቃሚ የማይኾንበትን ቀን ፍሩ፤የአላህ ቀጠሮ እውነት ነውና፤ቅርቢቱም ሕይወት አትሸንግላችሁ፤በአላህም (መታገስ) አታላዩ (ሰይጣን) አያታላችሁ።›› [ሉቅማን፡33]

9-ሰዎች አሳንሰው የሚመለከቷቸው ጥቃቅን ኃጢአቶች ውጤት ምን ሊሆን እንደሚችል ማሰብና ማስተነትን። ነቢዩﷺ ጉዳዩን በምሳሌ አስቀምጠውልናል። የሰዎች ስብስብ አንድ ሸለቆ ላይ ሰፈረሩና እያንዳንዱ ሰው አንዳንድ እንጨት አምጥቶ ምግባቸውን ማብሰል የሚያስችል ማገዶ መሰብሰብ ቻሉ። ጥቃቅን እንጨቶች ተሰብስበው ምግቡን እንዳበሰሉ ሁሉ፣ጥቃቅን ኃጢአቶችም ተሰብስበው የኃጢአንን ገላ በገሀነም እሳት ያቃጥላሉ ፦ ‹‹ቆዳዎቻቸው በተቃጠሉ ቁጥር ሌሎችን ቆዳዎች እንለውጥላቸዋለን፤›› [አልኒሳእ፡56]

10-አንድ የአላህ ባሪያ በኃጢአቱ ተጸጽቶ ተውበት ከማድረጉ በፊት በድንገተኛ ሞት ሊቀደም እንዲችል ማወቅ ይኖርበታል። ጊዜው ካለፈ በኋላ መጸጸት ጥቅም የለውም። አላህ ﷻ እንዲህ ብሏል ፦ ‹‹አንዳቸውንም ሞት በመጣባቸው ጊዜ፣እንዲህ ይላል፦ ጌታዬ ሆይ! (ወደ ምድረ ዓለም) መልሱኝ፤›› [አልሙእሚኑን፡99]

በተጨማሪም አላህ ﷻ እንዲህ ብሏል ፦ ‹‹የቁጭቱን ቀን አስፈራራቸው።››[መርየም፡39]

11-ክፉ ፍጻሜን (ሱኡል ኻትማ) ማሰብና ማስተንተን። አላህ ﷻ እንዲህ ብሏል ፦ ‹‹መላእክት ፊቶቻቸውንና ጀርቦቻቸውን እየመቱ . . ›› [አልአንፋል፡50]

12-ፈሪሃ አላህ እንዲያድርብህና እርሱን እንድትፈራ ከሚያደርጉህ ሰዎች ጋር መቀመጥ። አላህ ﷻ እንዲህ ብሏል ፦ ‹‹ነፍስህንም፣ከነዚያ ጌታቸውን ፊቱን (ውዴታውን) የሚሹ ኾነው በጧትና በማታ ከሚግገዙት ጋር አስታግስ፤›› [አልከህፍ፡28]

አላህን መፍራት ከሁለት ነገሮች ጋር የተያያዘ ነው ፦

ሀ- ቅጣቱን ከመፍራት ፦ይህ ከርሱ ጋር ሌላን ለአጋራው፣ኃጢአት ለፈጸመውና በትእዛዛቱ ላይ ላመጸው የተሰናዳውን አስከፊ ቅጣቱን መፍራት ነው።

ለ- አላህን ከመፍራት ፦ ይህ ደግሞ ዓሊሞችና እርሱን ያወቁ ጻድቃን ባሮቹ የሚፈሩት የፍርሃት ዓይነት ነው ፦ ‹‹አላህ ነፍሱን ያስጠነቅቃችኋል።›› [ኣል ዒምራን፡28]

ስለ አላህ ﷻ የሚኖረው ዕውቀት በጨመረ ቁጥር እርሱን መፍራትም እየጨመረ ይሄዳል። አላህ ﷻ እንዲህ ብሏል ፦ ‹‹አላህን ከባሮቹ ውስጥ የሚፈሩት፣ዐዋቂዎቹ ብቻ ናቸው፤›› [ፋጢር፡28]

ለጌታቸው ለአላህ ﷻ ፣ለስሞቹና ለባሕርያቱ ያላቸው ዕውቀት የተሟላ በሚሆንበት ጊዜ፣ከምንም በላይ እርሱን መፍራት ስለሚመርጡ ተጽእኖውና አሻራው በአካላዊ ድርጊቶች ላይ አርፎ ይስተዋላል።

አላህን መፍራት ከሚያስገኛቸው ጥቅሞች መካከል የሚከተሉት ይገኛሉ፦

ሀ- በቅርቢቱ የዱንያ ሕይወት ፦

የአላህ ፍርሃት ልብ ውስጥ ከሰፈረ፣የስሜታዊ ዝንባሌዎችንና የቁሳዊ ፍላጎቶችን ሰፈሮች አቃጥሎ ዱንያን ከልብ ያስወጣል።

1-በምድር ላይ መመቻቸትን ከሚያመጡ፣ ኢማንን ከሚያፋፉና መረጋጋትን ከሚያስገኙ ምክንያቶች አንዱ ነው። ቃል የተገባ ነገር ተፈጽሞ ሲገኝ መተማመንን ይጨምራል። አላህ ﷻ እንዲህ ብሏል ፦ ‹‹እነዚያም የካዱት፣ለመልክተኞቻቸው ፦ ከምድራችን በእርግጥ እናወጣችኋለን፤ወይም ወደ ሃይማኖታችን በእርግጥ ትመለሳላችሁ፣አሉ፤ወደነርሱም ጌታቸው እንዲህ ሲል ላከ ፦ ከሓዲዎችን በእርግጥ እናጠፋለን። ከነሱም በኋላ ምድሪቱን በእርግጥ እናስቀምጣችኋለን፤ይኸ በፊቴ መቆሙን ለሚፈራ፣ዛቻየንም ለሚፈራ ሰው ነው።›› [ኢብራሂም፡13-14]

2-በበጎ ሥራዎችና በልቦና ፍጹምነት (እኽላስ) ላይ ያበረታታል። የኣኽራው ታላቅ ምንዳ ሳይቀንስ በዱንያ ላይ መካካሻ ያለመፈለግ ተነሳሽነትን ያነቃቃል። አላህ ﷻ እንዲህ ብሏል ፦ ‹‹የምናበላችሁ ለአላህ ውዴታ ብቻ ነው፤ከናንተ ዋጋንም ማመስገንንም አንፈልግም። እኛ (ፊትን) የሚያጨፈግግን ብርቱ ቀን ከጌታችን እንፈራለንና፤(ይላሉ)።›› [አልደህር፡9-10]

በተጨማሪም አላህ ﷻ እንዲህ ብሏል ፦ ‹‹አላህ እንድትከበርና ስሙ በውስጧ እንዲወሳ ባዘዘው ቤቶች ውስጥ፣(አወድሱት)፤በውስጧ፣በጧትና በማታ ለርሱ ያጠራሉ፣አላህን ከማውሳትና ሶላትን ከመስገድ፣ዘካንም ከመስጠት፣ንግድም ሽያጭም የማያታልላቸው፣ልቦችና ዓይኖች በርሱ የሚገለባበጡበትን ቀን የሚፈሩ የኾኑ ሰዎች፣(ያጠሩታል)።›› [አልኑር፡36]

ልቦችና ዓይኖች በርሱ የሚገለባበጡበትን ቀን የሚፈሩ መሆናቸው፣መድህን እንዲፈልጉ፣አስፈሪውን ቀን እንዲጠነቀቁና መዝገባቸውን በግራ እንዳይቀበሉ በመስጋት ለበጎ ሥራ እንዲነሳሱ አድርጓቸዋል።

ለ- በወዲያኛው የኣኽራ ሕይወት ፦

አላህን የፈራ ሰው ፍርሃቱ ወደ በጎ ነገር ሁሉ ይመራዋል።

1-ባሪያው በትንሣኤ ቀን በአላህ ﷻ ዙፋን (ዐርሽ) ጥላ ስር ይሆናል። የአላህ መልክተኛﷺ እንዲህ ብለዋል ፦‹‹ማዕረግና ቁንጅና ያላት ሴት (ለዝሙት) ጠይቃው፣እኔ አላህን እፈራለሁ ያለ ሰው፣ . . . ›› (በቡኻሪ የተዘገበ)

ከሐዲሡ በግልጽ የምንረዳው ሴቲቱን ከተግባሯ ለመገሰጽና ራሱንም ለመምከር በአንደበቱ የተናገረ መሆኑን ነው። መርሁን ካወጀ በኋላ በአቋሙ ጸንቶ ገፍቶ የቀጠለ መሆኑንም እንገነዘባለን።‹‹(ሌላው) ለብቻው ሆኖ አላህን አስታውሶ ዓይኖቹ ያነቡ ሰው ነው . . .›› (በቡኻሪ የተዘገበ)

ዓይኖችን እንዲያለቅሱ ያደረገ የአላህ ፍራቻ በትንሣኤ ቀን ዓይኑ በጀሀነም እሳት እንዳትነካ ያደርጋል ማለት ነው።

2-ከአላህ ﷻ ምሕረት ለማግኘት ምክንያት ነው። ለዚህ ማስረጃው ቀጣዩ የነቢዩﷺ ሐዲሥ ነው ፦ ‹‹ከናንተ በፊት በነበሩት ሕዝቦች ውስጥ አላህ ሀብት የሰጠው አንድ ሰው ነበር። ለሞት ሲያጣጥር ለወንዶች ልጆቹ እንዲህ አለ ፦ እንዴት ያለ አባት ነበርኩ? ምርጥ አባት ነበርክ፣አሉት። እኔ ፈጽሞ መልካም ነገር ሠርቼ አላውቅምና ሲሞት ሬሳዬን አቃጥሉ፤ከዚያም አድቅቃችሁ ፍጩኝ፤ከዚያም በነፋሻ ቀን አመዴን አየር ላይ በትኑት፣አላቸው። ያላቸውን ፈጸሙ። አላህ ﷻ ሰበሰበውና ፦ ይህን እንድታደርግ ያደረገህ ምንድን ነው? አለው። የአንተ ፍራቻ ነው አለ፤(አላህም) በርኅራሄው ተቀበለው።›› (በቡኻሪ የተዘገበ)

አላህ ﷻ አለአዋቂነቱን አይቶ ምክንያቱን ተቀብሎት፣ጌታውን መፍራቱም አማላጅ ሆነው እንጂ ዳግም ከሞት መቀስቀስን የሚክድ ሰው ካፍር ነው።

3-አላህን መፍራት ባለቤቱን ወደ ጀነት ያደርሳል። ነቢዩﷺ እንዲህ ብለዋል ፦ ‹‹የፈራ ሰው በሌሊቱ መመጀመሪያ ላይ ጉዞ ይጀምራል፤በሌሊቱ መመጀመሪያ ላይ የተጓዘም ካሰበበት ይደርሳል፤ንቁ! የአላህ ወረት (ዕቃ) ውድ ነው፤ንቁ! የአላህ ወረት (ዕቃ) ጀነት ነው።›› (በትርምዚ የተዘገበ)

4-በትንሣኤ ቀን ጸጥታና መረጋጋትን ማግኘት። አላህ ﷻ ሐዲሥ አልቁድሲ ውስጥ እንዲህ ብሏል ፦ ‹‹በኃያልነቴ ይሁንብኝ በባሪዬ ላይ ሁለት ፍርሃቶችንና ሁለት ጸጥታዎችን አላጣምርበትም፤በዱንያ ላይ ከፈራኝ በትንሣኤ ቀን ጸጥታና ደህንነት እሰጠዋለሁ፤በዱንያ ላይ የኔን አዘናግቶ መያዝ ያልፈራ ከሆነ ግን በትንሣኤ ቀን አስፈራዋለሁ።›› (በበይሀቂ የተዘገበ)

5-አላህ ﷻ በክብር ከገለጻቸው ትጉሃን ምእመናን አገልጋዮቹ ተርታ መቀላቀል። አላህ ﷻ እንዲህ ብሏል ፦ ‹‹ሙስሊሞች ወንዶችና ሙስሊሞች ሴቶች፣ምእምናንና ምእምናትም፣ታዛዦች ወንዶችና ታዛዦች ሴቶችም፣እውነተኞች ወንዶችና እውነተኞች ሴቶችም፣ታጋሾች ወንዶችና ታጋሾች ሴቶችም፣አላህን ፈሪዎች ወንዶችና አላህን ፈሪዎች ሴቶችም፣መጽዋቾች ወንዶችና መጽዋቾች ሴቶችም፣ጿሚዎች ወንዶችና ጿሚዎች ሴቶችም፣(ካልተፈቀደ ሥራ) ብልቶቻቸውን ጠባቂዎች ወንዶችና ብልቶቻቸውን ጠባቂ ሴቶችም፣›› [አልአሕዛብ፡35] ,እነዚህ ባሕርያት በነሱ ለመገለጽ ሁሉም ሰው መትጋት ያለበት ክቡር ባሕርያት ናቸው። አላህ ﷻ እንዲህ ብሏል፦ ‹‹ጌታቸውን ለመፍራትና ለመከጀል የሚጠሩት ኾነው፣ጎኖቻቸው ከመጋደሚያ ስፍራዎች ይራራቃሉ፤ከሰጠናቸውም (ጸጋ) ይለግሳሉ። ይሠሩትም በነበሩት ለመመንዳት፣ከዓይኖች መርጊያ ለነሱ የተደበቀላቸውን (ጸጋ)፣ማንኛይቱም ነፍስ አታውቅም።›› [አልሰጅዳህ፡16]

በተጨማሪም አላህን ﷻ እንዲህ ብሏል፦ ‹‹እርሱ የመጨረሻይቱን ዓለም (ቅጣት) የሚፈራ፣የጌታውንም ችሮታ የሚከጅል ሲኾን፣በሌሊት ሰዓቶች ሰጋጅና ቋሚ ኾኖ ለጌታው የሚግገዛ ሰው፣(እንደ ተስፋ ቢሱ ከሓዲ ነውን? በለው)፤እነዚያ የሚያውቁና እነዚያ የማያውቁ ይተካከላሉን? በላቸው፤የሚገነዘቡት ባለ አእምሮዎቹ ብቻ ናቸው።›› [አልዙመር፡9]

አላህ ﷻ እንዲህ ብሏል፦ ‹‹እነዚያ እነሱ ከጌታቸው ቅጣት ፈሪዎች የኾኑት። የጌታቸው ቅጣት (መምጣቱ) የማያስተማምን ነውና።›› [አልመዓሪጅ፡27-28]

አላህን ﷻ ከአገልጋዮቹ ሁሉ ይበልጥ ቅርቡ የሆኑትን ነቢያት፣እርሱን የሚፈሩት በመሆናቸው አወድሷቸዋል ፦ ‹‹እነሱ በበጎ ሥራዎች የሚቻኮሉ፣ከጃዮችና ፈሪዎች ኾነው የሚለምኑንም፣ነበሩ፤ለኛ ተዋራጆችም ነበሩ፤›› [አልአንቢያ፡90]

መላእክትም ጭምር ጌታቸውን ይፈራሉ። አላህ ﷻ እንዲህ ብሏል ፦ ‹‹ጌታቸውን ከበላያቸው ሲኾን ይፈሩታል፤የታዘዙትንም ሁሉ ይሠራሉ።›› [አልነሕል፡50]

6-የአላህን ﷻ ውዴታ ማግኘት። አላህ ﷻ እንዲህ ብሏል ፦ ‹‹አላህ ከነሱ ወደደ፤ከርሱም ወደዱ፤ይህ ጌታውን ለፈራ ሰው ነው።›› [አልበይናህ፡8]

አላህን ﷻ የሚያውቁ ትጉሃን አገልጋዮች ፍርሃት

አላህን ﷻ ከሌሎች ይበልጥ የሚያውቁ ትጉሃን አገልጋዮች፣ካላቸው በጎ ሥራና ጥልቅ ተስፋ (ረጃእ) ጋር ከማንም በላይ አብዝተው ይፈሩታል። ይህን ከሚያሳዩ ምሳሌዎች የሚከተሉትን እናገኛለን ፦

- ነቢዩ ﷺ ቆመው በመስገድ ላይ እያሉ፣ከተከበረው ደረታቸው ውስጥ ከማልቀስ ብዛት የድስት መንተክተክን የሚመስል ድምጽ እስኪሰማ ድረስ ማልቀሳቸው። (በአሕመድ፣በአቡ ዳውድና በነሳኢ የተዘገበ)

- አቡ በክር t ምላሳቸውን ይዘው እንዲህ ብለዋል ፦ ‹‹ይህ ነው ለአደጋ ያጋለጠኝ››

በተጨማሪም እንዲህ ብለዋል ፦ ‹‹ምነው የሚበላ ዛፍ በሆንኩ ኖሮ!››

ዑመር ብን አልኸጧብም t እንዲህ ብለዋል ፦ ‹‹ምነው ምንም የማይወሳ ነገር በሆንኩ ኖሮ! ምነው እናቴ ባልወለደችኝ ኖሮ!››

በተጨማሪም እንዲህ ብለዋል ፦ ‹‹አንድ አህያ በኤፍራጠስ ወንዝ ዳርቻ በርሃብ ቢሞት፣በትንሣኤ ቀን አላህ በዚያ (በመራቡ) እንዳይጠይቀኝ እፈራለሁ።››

በተጨማሪም እንዲህ ብለዋል ፦ ‹‹እናንተ ሰዎች ሆይ! ሁላችሁም ከአንድ ሰው በስተቀር ወደ ጀነት ገቢዎች ናችሁ ተብሎ በሰማይ ጠሪ ቢያውጅ፣እኔ ያ ሰው እንዳልሆን በእርግጥ እፈራለሁ።››

ዑሥማን ብን ዐፍፋን t እንዲህ ብለዋል ፦ ‹‹ከሞትኩ በኋላ ዳግም ባልቀሰቀስ እወድ ነበር።››

ሌሊቱን ሙሉ በአላህ ውዳሴ፣በሶላትና በቁርኣን ንባብ ያሳልፉ የነበሩ ሰው ናቸው እንዲህ ያሉት። እመ ምእመናን ዓእሻ (ረ.ዐ) የሚከተለውን የአላህ ቃል ፦‹‹አላህም በኛ ላይ ለገሰ፤የመርዛም እሳት ቅጣትንም ጠበቀን።›› [አልጡር፡27]

ሶላታቸው ውስጥ ያነቡና ሳያቋርጡ ያለቅሱ ነበር . . ። ‹‹ብትቀጣቸው እነሱ ባሮችህ ናቸው፤ለነርሱ ብትምርም አንተ አሸናፊው ጥበበኛው ነህ (ይላል)።›› [አልማኢዳህ፡118]

አላህን መፍራት (ኸውፍን) የሚመለከቱ ብያኔዎችና ማሳሰቢያዎች ፦

1-ስጋት (ኸሽያህ) ከፍርሃት (ኸውፍ) የጠለቀና ለየት ያለ ነው። ስጋት አላህን ይበልጥ ለሚያውቁ ትጉሃን አገልጋዮች ነው ፦ ‹‹አላህን ከባሮቹ ውስጥ የሚፈሩት፣ዐዋቂዎቹ ብቻ ናቸው፤አላህ አሸናፊ መሓሪ ነው።›› [ፋጢር፡28]

ፍርሃታቸው እርሱን ከማወቅ ጋር የተቆራኘ ፍርሃት ነው። ነቢዩﷺ እንዲህ ብለዋል ፦ ‹‹በአላህ እምላለሁ፣እኔ ከሁላችሁም ይበልጥ እርሱን ’ምፈራና እርሱን ’ምሰጋ ነኝ።›› (በሙስሊም የተዘገበ)

ለርሱ የሚኖረን ፍርሃትና ስጋት አላህን፣ስሞቹን፣ባሕርያቱን፣ምሉእነቱን፣ግርማ ሞገሱንና ኃልልነቱን አስመልክቶ በሚኖረን ዕውቀትና ግንዛቤ ደረጃ ነው።

‹‹አላህን ከባሮቹ ውስጥ የሚፈሩት፣ዐዋቂዎቹ ብቻ ናቸው፤አላህ አሸናፊ መሓሪ ነው።›› [ፋጢር፡28]

2-ፍርሃት ለጥረት ለበጎ ሥራ፣ኃጢአትን እርግፍ አድርጎ በመተው ተጸጽቶ ተውበት ለማድረግ የሚያነሳሳ ሲሆን ጠቃሚ ይሆናል። ፍርሃት የሚመነጨው የኃጢአትን አስቀያሚነት ከማወቅ፣የተላለፈውን ማስጠንቀቂያ እውነተኛነት ከማረጋገጥ፣ኃያሉን ቻይ አምላክ ከማወቅ ነው። ለሰናይ ተግባር ለጥረት፣ለትጋትና ለተውበት የማያበረታታ የአላህ ፍርሃት የሚታሰብ አይደለም።

አላህን የፈራ ሰው፣ማንም አይጎዳውም፤ከርሱ በስተቀር ሌለውን የፈራ ሰውን ማንም አይጠቅመውም።

ፈዲል ብን ዕያድ

3-አላህን ﷻ መፍራት ከግዴታዎች አንዱ ሲሆን፣ለኢማን መገኘት ካለባቸው ነገሮች ውስጥም አንዱ ነው። ወደ አላህ ﷻ በሚደረገው ጉዞ ውስጥ ክቡር ከሆኑ ምዕራፎችም አንደኛውና ለልብ እጅግ ጠቃሚው ምዕራፍ ነው። በሁሉም ሰው ላይ ግዴታ (ዋጅብ) ሲሆን፣ከኃጢአቶች፣ከዱንያ፣ከመጥፎ ጓደኞች፣ከዝንጋታ፣ከቸልታና ከሕሊና ዝገት ይከላከላል።

   
Subscibe